«Үлэ — сайдыы, күргүөм күүс» көрүү -күрэх түмүктэннэ

Россияҕа Педагог уонна наставник, Саха сиригэр Үлэ , Бүлүү улууһугар Доруобуйа сылын чэрчитинэн биһиги нэһилиэккэ олохтоох дьаһалта уонна «Чэчир» НАДЬ көҕүлээһининэн үлэ коллективтарын икки ардыгар түөрт түһүмэхтээх «Үлэ — сайдыы, күргүөм күүс» диэн көрүү- күрэх түмүктэннэ. Бастакы күрэх- Республика күнүгэр сөп түбэһиннэрэн өбүгэ оонньуулара, иккис күрэх — волейбол, үһүс күрэх- Кыайыы күнүгэр хор киирсиитэ, уонна түмүктүүр фестиваль- концерт бэс ыйын 2 күнүгэр ыытылынна. Көрүү- күрэх концерда 6 булгуччулаах нүөмэрдэртэн: фольклор, дуэт, ансамбль, сценка, норуот үҥкүүтэ, оригинальнай жанртан тиһилиннэ. Оҕо уһуйаана, оскуола уонна олохтоох дьаһалта, «Чэчир» НАДЬ холбоһуктаах коллективтара көхтөөх кыттыыны ыллылар. Бэс ыйа- түбүктээх ый. Сороххо отчуот, сороххо экзамен, сороххо банкет, уонна да атын тиһигин быспат үлэ быыһыттан быыс булан, бэлэмнэнэн, түмсэн олус бэрт концерды туруорбут чахчы да Үлэ коллективтарыттан сөҕөбүт,үөрэбит. Оҕо уһуйаанын коллектива ветераннарын тэрээһин аайы кытыннаран, өрө тутан уонна 100% бары кыттан утум ситимин уонна түмсүүлээх буолуу бастыҥ холобурун көрдөрдүлэр. Ча5ылхай нүөмэрдэр — наставник , ветеран учуутал А.В.Мандарова уонна эдэр педагог В.В.Константинов толорууларыгар норуот ырыата, олохтоох дьаһалта сүрүннүүр специалиһа Дь. ДЬ. Яковлев уонна «Чэчир» НАДЬ эдэр үлэһитэ А.Петров дуэттара, оскуола коллективын «Синхронное плавание» нүөмэрдэрин ааттыахха наада.

Сонун талааннар арылыннылар: Н.Осипова, С.Софронов, В.Константинов, А.Петров, А.Степанов, кырачаан В.Иванов.

Бэлиэтиэҕи баҕарыллар хас көрүҥ аайы дэгиттэр талааннарынан киэргэтэр С.В.Петрованы, Л.В.Константинованы, С.Н.Каратаеваны, Д.В.Каратаеваны, В.В.Константиновы, А.Степановы, У.Г.Иванованы уо.д.а. Туспа махталбытын уонна кэрэхсэбилбитин биллэрэбит тэрилтэлэрин эр дьонун бэйэлэрин холобурдарынан үҥкүүгэ , ырыаҕа түмэ тардыбыт эдэр, кэскиллээх салайааччыларбытыгар , олохтоох дьаһалта баһылыга Н.В. Петровка, оскуола директора А.В.Шадриҥҥа. Концерт түмүгэр олохтоох дьаһалта уонна норуот айымньытын киинин холбоһуктаах коллективтара кыайыылааҕынан таҕыста.

Онтон «Үлэ — сайдыы, күргүөм күүс» көрүү- күрэх түмүк кыайыылааҕынан Социалистическай Үлэ Геройа В.П. Трофимова аатын сүгэр оскуолабыт коллектива буолла.

Кыайыылаах тэрилтэ улуус баһылыга нэһилиэктэргэ бастыҥ үлэһиттэри өйүүр сыалтан анаабыт Москва куорат Бэс Чагда санаторийыгар путевканан биир үлэһитин маанылыыр кыахтанна. Түмсүүлээх, көхтөөх нэһилиэкпит тэрилтэлэригэр уонна кинилэр салайааччыларыгар барҕа махталбытын биллэрэбит.