Аан дойдутааҕы поэзия күнүгэр аналлаах «Айар кутум аргыстара» литературнай киэһэ

Кулун тутар 21 күнэ Аан дойдутааҕы поэзия күнэ, 1999 сыллаахха поэзия көмөтүнэн араас омук тылынан тиэрдиини өйүүр соруктаах уонна сүтэн эрэр тыллары чөлүгэр түһэрэр туһуттан, ЮНЕСКО кулун тутар 21 күнүн Аан дойдутааҕы Поэзия күнүнэн биллэрбитэ.

Ол чэрчитинэн нэһилиэкпитигэр » Айар кутум аргыстара» литературнай киэһэ ыытылынна. Тэрээһиммит 3 түһүмэхтэн турда.

Бастакы түһүмэҕэр «Хоһоон алыптаах ыллыгар» бу манна Арассыыйаҕа Дьиэ кэргэн, Саха сиригэр Оҕо саас, Бүлүү улууһугар Аржаков сылларыгар аналлаах хоһооннору нэһилиэкпит хомоҕой хоһоонньуттара бэйэлэрин суруйбут хоһооннорун ааҕан иһитиннэрбиттэрэ. Онтон иккис түһүмэҕинэн «Толкуйдаа, оонньоо, кыай» оонньуу күрэх ыытыллыбыта.

Ол иһигэр блиц ыйытыктар, «Биир буукубаттан» диэн мүнүүтэҕэ хоһоон айыытыгар күрэх, таба таай уус-уран айымньыттан ыйытыктар, спортивнай түһүмэх быа эрийиитэ, суруйааччылар ааттарын ааттаталаа, анаграмма бэрт көхтөөхтүк ыытыллыбыта.

Үһүс түмүктүүр түһүмэхпитинэн «Бары бииргэ дорҕоонноохтук ааҕыахха» хоһооннору ааҕыы буолла. Манан Аан дойдутааҕы поэзия күнүгэр аналлаах тэрээһиммит ырыа буолбут хоһооннорунан уопсай ырыанан түмүктэммитэ.Күндү хоһоон айааччылар, хомоҕой хоһооннору суруйан, ааҕааччыларгытын өссө даҕаны үөрдэ-көтүтэ турун.