Кыһыны атаарыы, сандал сааһы көрсүү

Муус устар 15 күнүгэр биһиги нэһилиэккэ кыһыны атаарыы, сандал сааһы көрсүү бырааһынньыга бэрт көхтөөхтүк, сэргэхтик, элбэх дьон түмсүүлээх буолан ааста.

Тэрээһин эҕэрдэ номердарынан саҕаланна. Атыы- эргиэн ярмаркаҕа ас арааһа атыыланна, спринт лотерея оонньонно. Түөлбэнэн «Весна красна» диэн фотозона күрэҕэр түөлбэлэр бииртэн биир кэрэ көстүүлээх фотозона оҥостон дьон кэрэхсэбилин ыллылар.

«Саһарҕа» түөлбэ үрдүк таһымнаах бэлэмин көрдөрөн кыайыылааҕынан таҕыста. Онтон биирдиилээн күрэххэ массыына соһуутугар Альберт Степанов саамай кыахтааҕын көрдөрөн грамотанан уонна сертификатынан наҕараадаланна.

Оҕолор үөрэ-көтө Иван Петров буранынан хатааһылаатылар.

Кыра кылаас кыргыттара сыттыгынан биэрсиигэ күрэхтэстилэр.

Уонна дьэ саамай интэриэһинэйинэн түөлбэлэр икки ардыларыгар ыытыллыбыт «Быһый. Сымса. Бэргэн» күрэх буолла. Бу күрэххэ икки эр киһи, биир дьахтар уонна биир уол оҕо кытынна.

Алта түһүмэх түмүгүнэн «Саһарҕа» бастакы миэстэ, иккис миэстэ «»Сардаана», үһүс миэстэ «Байылыат» түөлбэ буоллулар. Кыайыылаахтар грамотанан уонна уу харчынан наҕараадаланнылар. Мэлдьи бу курдук түмсүүлээх, көхтөөх буолуоҕуҥ!