«Лира» кулууп хоһоонньут Ийэлэрин кытта истиҥ көрсүһүү

Алтынньы 18 күнүгэр Өкүндү олохтоох бибилэтиэкэтигэр Саха Өрөспүүбүлүкэтигэр Ийэ күнүн чэрчитинэн нэһилиэк айар куттаах ийэлэрэ, эбэлэрэ хоһоону сэҥээрээччилэрэ муһуннулар.

«Лира» түмсүү үлэтин маннык саҕалаата.

Хас биирдии хоһоон ийэҕэ уҕараабат тапталы, ааспат ахтылҕан иэйиитин кэрэһэлиир.

Манна мустубут айар куттаах ийэлэрбит, эбэлэрбит ийэлэригэр анаммыт истиҥ тылларын, айбыт хоһооннорун биир тыынынан аахтылар.

Сорудаҕы толорон түмсүү кыттыылаахтара сөбүлүүр дьарыктарын кэпсээтилэр, коллекцияларын көрдөрдүлэр, буруолуу сылдьар хоһооннорун аахтылар.

Бу олорон бэриллибит тыллартан тута хоһоон айдылар, ыйытыктарга хоруйдаатылар уонна биллэр поэттар ийэҕэ анаабыт хоһоонноруттан дорҕоонноохтук аахтылар. Түмүккэ «Лира»түмсүү инники былаанын торумнаатыбыт.
Кинигэ быыстапкатыгар олохтоох автордар, уонна Ийэҕэ аналлаах кинигэлэр туруорулуннулар.

Бу үөрүүлээх күнү В.П. Трофимова аатынан оскуолабыт үөрэнээччилэрэ эҕэрдэ хоһоон ааҕан, инсценировка көрдөрөн киэргэтэн биэрдилэр.
Ити курдук, тэрээһиммит алаадьылаах, итии чэйдээх остуол тула, истиҥ-иһирэх кэпсэтии сиэринэн ааста.