Екюндю нэһилиэгэр саҥа маҕаһыын арылынна

Бүгүн, атырдьах ыйын 1 күнүгэр биһиги дьоҕус нэһилиэкпитигэр үөрүүлээх түгэн тосхойдо.

«Феникс» хааччахтаах эппиэтинэстээх атыы-эргиэн тэрилтэтэ саҥа маҕаһыын дьиэтин кылгас кэмҥэ бэрт тупсаҕайдык, аныгылыы сайдыылаах гына тутан үлэҕэ киллэрбитин бэлиэтиир малааһын тэрээһинин тэрийдибит.

Эҕэрдэ үҥкүүннэн, алаадьылаах алгыһынан саҕаламмыт үөрүүлээх тэрээһин символическай күлүүс туттарыытынан, лиэнтэ кырыйыынан сиэрэ ситтэ, «Феникс» тэрилтэ маанылаах фуршет остуолунан түмүктэннэ.

Олохтоох дьаһалта баһылыга Никифор Владимирович тэрилтэ салайааччыта Ольга Александровна Алексееваҕа нэһилиэк социальнай- экономическай сайдыытыгар өҥөтүн иһин » За вклад в развитие Екюндюнского наслега» бэлиэ туттарда.

Улуус баһылыгын Бочуоттаах грамотатынан маҕаһыын сэбиэдиссэйэ А.А.Никитина наҕараадаланна.

Оскуола директора уһун кэмҥэ бииргэ үлэлэһэр тэрилтэтигэр Махтал сурук туттарда. Нэһилиэкпит ытык кырдьаҕаһа, потребкооперация бэтэрээнэ Р.У.Иванова долгуйан туран эҕэрдэ, алгыс тылын анаата.

Тэрээһиҥҥэ кыттыспыт, тэрийсибит, кэлэн киэргэппит, ыалдьыттаабыт дьоммутугар барҕа махтал биллэрэ бит.