🌿🌿🌿Ыһыах — үйэлээх үгэспит

Ыһыах – айылҕа уһуктуутун, от-мас чэчириии тыллыытын, саҥа олох саҕаланыытын ситимниир. Бу күн саха дьоно түөлбэлээн түмсэн, кырылыы кыынньар, утаҕы ханнарар кымыс ыймахтаан, арыылаах алаадьы, сыалаах эт амсайан, күөх окко көччүйэ оонньоон, күрэс былдьаһан, илин-кэлин түсүһэ оһуохайдаан дайара, кылыһахтаах тойугу истэн дуоһуйара, алгыстанан-арчыланан, күнү көрсөн күүс-сэниэ ылара.
Өбүгэ саҕаттан илдьэ кэлбит төрүт үгэспит, уһун унньуктаах кыстык кэнниттэн сайа сүүрэр салгыннаах, чаҕылхай күннээх самаан сайыммыт барахсан кэлбитин уруйдаан-айхалаан көрсөр, күүтүүлээх ыһыахпыт Өкүндү нэһилиэгэр бэс ыйын 25 күнүгэр дэриэбинэ ортотугар баар, эбэбит кытыытыгар турар, саҥа ыһыахтыыр түһүлгэбитигэр, күн-дьыл туран биэрэн бэркэ ааста. Быйылгы үрүҥ тунах ыһыахпыт Арассыыйаҕа Педагог уонна Уһуйааччы, Саха Сиригэр Үлэ, улууспутугар Доруобуйа сылларын чэрчитинэн ыытылынна.

Нэһилиэк далбардара сахалыы таҥастарын сайбаччы таҥнан киирии аркаҕа, саламанан киэргэммит чэчирдэр быыстарынан кэлбит дьону уруйдуу-айхаллыы, арыылаах алаадьынан айах тутан, сөрүүн утаҕы утары уунан көрүстүлэр.

Ыһыахпыт алгыһын үгэс быһыытынан, олоҥхоһут Харатай Баһылай төрөппүт кыыһа, учуутал, СӨ үөрэҕириитин туйгуна Анна Васильевна Мандарова бар дьоҥҥо үтүөнү эрэ баҕаран аал уоту айах тутан, тойук туойан саҕалаабыта.

Ол кэннэ бар дьонун сэргэ тула мунньан, күөх сайын кэлбитинэн, ыһыах ыһар ытык күммүт үүммүтүнэн оһуохай этэн уруйдуу туойбута.

Ыһыахпыт өрөгөй чааһа баһылык Никифор Петров эҕэрдэтинэн саҕаламмыта уонна сыл бастыҥнарын наҕараадалааһынан түмүктэммитэ. Ол курдук, Үлэ сылынан РФ Үлэ уонна Социальнай харалта министиэристэбитин Махтал Суругунан социальнай харалта специалиһа Федосия Мандарова,

СР муниципальнай сулууспатын бэтэрээнэ анал ааты олохтоох дьаһалтаҕа уһун кэмнэргэ үтүө суобастаахтык үлэлээбит Галина Григорьева,

Өкүндү нэһилиэгин Бочуоттаах олохтооҕо үрдүк ааты Михаил Петров ыллылар.

Бүлүү улууһун бэтэрээннэрин сэбиэтин Добун суруктарынан нэһилиэк Бочуоттаах олохтоохторо Р.У.Иванова, С.Н.Кузьмина наҕараадаланнылар.

“Өкүндү нэһилиэгэ” МТ баһылыгын Добун суруктарын нэһилиэкпит бастыҥ тэрилтэлэрин туруу үлэһиттэрэ уонна республикатааҕы “Спортивные якутяне” оҕолор спартакиадаларын призердара уонна кыттыылаахтара тутан үөрдүлэр-көттүлэр.

Бу күн, РФ доруобуйатын харыстабылын Туйгуна ааты ылбыт А.Н.Петрова уонна бу күннэргэ 60 сааһын туолбут киэн туттар биир дойдулаахпыт В.Г.Семенова

МТ Эҕэрдэ суруктарын уонна сыаналаах бэлэхтэрин туттулар.
Быйылгы ыһыахпыт “Уйгулаах ыһыаҕы уруйдаан” концертнай программатын биир уратытынан нэһилиэк эр дьонун эҕэрдэ нүөмэрдэрэ буоллулар,

ол курдук сонун ырыалары олохтоох дьаһалта сүрүннүүр специалиһын Дьулусхан Яковлев ырыалара, “Чэчир” НАДь үлэһитэ Антон Петрову кытта дуэттара, тыа хаһаайыстыбатын специалиһа Дмитрий Алексеев, нэһилиэкпит көмүс куоластааҕа И.В.Данилов ырыалара,

аҕа баһылыкпыт кыттыылаах уолаттар “Чохчоохой” үҥкүүлэрэ,

оскуола алын кылааһын үөрэнээччилэрэ Вадим Иванов солота, республика таһымнаах чабырҕахсыт кыргыттарбыт

Инесса Петрова, Марина Афанасьева толоруулара дьон-сэргэ биһирэбилин ыллылар.

Кэнсиэри “Тойук” фольклорнай бөлөх,

“Иэйии” дьахталлар ансамбылларын ырыата уонна

алаадьылаах үҥкүүлэрэ ситэрэн-тупсаран биэрдилэр.

Олохтоох дьаһалта ыһыахха мустубут бар дьону эмис ынах этинэн уонна ис минэ буһаран күндүлээтилэр,

дьон-сэргэ тарҕаһан хаалбакка аһылык түһүлгэтигэр түбүрүөннээн олорон тото-хата, астына-дуоһуйа аһаатылар.

“Ыһыаҕым саргылаах таҥаһа” конкурска быйыл хаһааҥҥытааҕар да элбэх киһи кытынна.

Оҕо таҥаһыгар – Айгуль Кириллина,

эр киһи таҥаһыгар, Тааһаҕартан ыалдьыппыт, бэйэбит уолбут Капитон Львов, дьахталларга – Анастасия Николаева,

дьиэ кэргэнинэн сахалыы таҥаска 20-чэ буолан тоҕуоруһан киирэн кыттыбыт Любовь, Виктор Константиновтар улахан дьиэ кэргэннэрэ бастыан бастаатылар.

Ыытааччылар ааттарыттан биһирэбил бирииһи 3 оҕолоох Терентьевтар эдэр ыал туттулар.
“Тэйэ сэгэйиҥ, көтө кынаттаныҥ” диэн Тунах ыһыах бастыҥ оонньуутун — оһуохай конкурсугар, оҕолорго, Илбэҥэттэн ыалдьыппыт Сандал Антонов бастаата, улахан дьоҥҥо кылыһахтаах куоластаах, эриэккэс тыллаах, хомоҕой хоһоонноох оҕо эрдэҕиттэн оһуокайдаан ойор, эһиэкэйдээн тэйэр, олоҥхолоон да ылар Капитон Львов ыһыахпыт киэргэлинэн буолла.

Онон, оһуохайбыт өтөрүнэн сүппэт, симэлийбэт суоллааҕын илэ харахпытынан көрөн итэҕэйдибит, эт кулгаахпытынан истэн астынныбыт.
Күнүскү өттүгэр быһый, сымса, түргэн оскуола оҕолорун ортотугар хапсаҕайга, мас тардыһыытыгар, сүүрүүгэ күрэхтэһиини спорт специалиһа Александр Поскачин ыыппыта. Манна төрөөбүт сылларынан 3 группаҕа арахсан, бастаабыттар уу харчынан бириистэри тутаннар, түһүлгэ тухары араас атыылаах хорчуоппалар диэки ыстаннылар.
Ыһыахпыт киэргэлинэн Арассыыйаҕа Педагог уонна Уһуйааччы, Саха Өрөспүүбүлүкэтигэр Үлэ сылларын чэрчилэринэн ыытыллыбыт РСФСР, СӨ үөрэҕирииилэрин Туйгуна, “Гражданскай килбиэн”, “Учууталлар учууталлара”, СӨ үөрэҕириитин, Бүлүү улууһун бочуоттаах ветераннара, “Бүлүү улууһун кун-күбэй ийэтэ” бочуоттаах бэлиэлэр хаһаайыннара, тыыл, үлэ ветерана Сивцева Розалия Терентьевна 90 сааһыгар аналлаах “Билиигэ, кэрэҕэ-сырдыкка уүуйааччы” диэн ааттаах күөн күрэс буолла.

Бу конкурска Тааһаҕартан кэлэ сылдьар ыалдьыттарбыт уһуйааччы — информатика учуутала Федора Алексеевна Петрова уонна эдэр педагог, оскуола дириэктэринэн үлэлии сылдьар Капитон Петрович Львов бастакы миэстэни ыллылар.

Өкүндүбүт уйгулаах ыһыаҕын 5-с төгүлүн ыытыллар “Чабычахаан Боотур” күрэхпит түмүктээтэ.

Бу күрэххэ олохтоох дьаһалта сүрүннүүр специалиһа Дьулусхан Яковлев “Чабычахаан Боотур – 2023” үрдүк аатын ылан үөрүү үктэллэннэ, кыайыы кынаттанна.

Дьэ, бу курдук Өкүндүлэр, көхтөөхтүк үөрэн-көтөн туран, санаалыын сайҕанан, дууһалыын сынньанан самаан сайыммытын уруйдуу-айхаллыы көрүстүбүт.

.