Хас биирдии нэһилиэккэ бастыҥ үлэтинэн- хамнаһынан үрдүккэ тахсыбыт, аатырбыт үтүөкэн дьоннордоох. Сылдьалларын, айалларын- туталларын тухары төрөөбүт дойдуларын ааттата сылдьаллар. Ол курдук, биһиги нэһилиэк киэн тутта ааттыыр биир бастыҥмыт — СР культуратын туйгуна, филологическай билим дуоктара, ХИФУ саха салаатын кафедратын сэбиэдиссэйэ, СР суруйааччыларын сойууһун чилиэнэ, биллиилээх Аламповед учуонай В.Г.Семенова бэс ыйын 12 күнүгэр үлэ үөһүгэр сылдьан 60 сааһын бэлиэтиир дьоро күнэ үүннэ. Ону бэлиэтээн, кэрэни кэрэхсиир айар куттаах биир дойдулаахтара «Чэчир»норуот айымньытын дьиэтигэр алгыстаах алаадьылаах, итии чэйдээх остуол тула мустан «Алампалыын алтыһан» диэн истиҥ- иһирэх литературнай киэһэ тэрилиннэ. Киһи- киһи араас айылгылаах, олоххо араас аналлаах. Сорох инникини ыралааһынынан, былааннааһынынан, сорох уруккуну ахтыынан олоруо, сорох күүстээх үлэнэн олох суолун тутуһуо. Күннээҕи олоҕу кыра да көстүүлэригэр суолта биэрэн, таба көрөн, төһө сөбүн- сыыһатын ырыҥалаан, төрүөтүн быһаарар бөлүһүөктүү толкуйдаах, айар талааннаах дьонтон биирдэстэрэ Валентина Григорьевна оҕо сааһыттан саҕалаан эдэр эрчимнээх кэмнэрин, үлэтин-хамнаһын, тэттик кэпсээннэрин, чинчийэр үлэлэрин нөҥүө сэгэтэн билистибит, сэргээтибит, истиҥник ахтыстыбыт. Бастатан туран, «Ойор- тэбэр оҕо сааһым» диэн хайысхаҕа дьүөгэтэ, балтыта Л.Я.Кононова истиҥ ахтыы оҥордо, оскуола- производство- үрдүк үөрэх диэн быраабыланнан күргүөм күүстээх үлэ үөһүгэр сылдьыбыт кэмнэрин, комсомолтан партияҕа үүнүү, Верховнай совет депутата буолар чиэскэ тиксии саҕанааҕы урукку хаһыат балаһаларын булан аҕалан сырдатта. Оҕо саас сылаас, көрүдьуөс өйдөбүллэрин кэпсээн сэргэхситтэ, бары да ол кэмнэргэ төннүбүт курдук сананныбыт. «Оҕо сааһым оонньуулара» диэн Валентина оччотооҕу дэриэбинэ оҕолорун олохторун ойуулаабыт сүрдээх истиҥ иэйиилээх кэпсээнин, устудьуон сылдьан түбэспит түбэлтэлэриттэн көрүдьүөс кэпсээннэрин ааҕан сонньуйан ыллыбыт. «Алампа мин олохпор» диэн иккис хайысханы «Тугу туойабын? » диэн Алампа Үлэ киһитин өрө тутар хоһоонун нэһилиэк бас- көс эр дьоно ааҕан доргутууларынан саҕаланна. Манна Валентина Григорьевна ийэлээх аҕатын истиҥ тапталларын устуоруйатыгар, моһоллору туораан уруу тэрийэн дьоллоноллоругар Алампа айымньыта быһаарыылах суолталаммыта суруйааччы олоҕун чинчийии кини олоҕун суола буолара эрдэттэн биллибит курдугун сөхтүбүт. А.И.Софроновка аналлаах кинигэлэрин сырдатта олохтоох библиотека үлэһитэ М.Д.Михайлова. Валентина Григорьевна бу улуу суруйааччыны ааҕааччыга туох эрдэ биллибэт өрүттэриттэн арыйан саха куттаахха барытыгар Алампаны таптаппытын саха тылын учуутала У.Г.Иванова билиһиннэрдэ.
Талааннаах киһи барытыгар талааннаах. Валентина Григорьевна үбүлүөй, сыбаайба курдук дьоро киэһэлэри ыҥырыкка сылдьар ыытааччы. Эдэр ыал кэскил тэринэр быһаарыылаах күннэрин ыытааччытын таларга эппиэтинэстээхтик сыһыаннаһаллара биллэр суол. Сырдык- ыраас айылгылаах, сылаас холумтаннаах алгыстаах ыытааччы буолан, Григорьевна хас сыбаайба ыыппытын ахсаанын бэйэтэ да ааҕан сиппэтэ буолуо.
Салгыы юбилярбыт суруйбут » Көрүдьүөстэр» хомуурунньуктарыттан атастаһа сылдьан ааҕан, сорох дьоруойдарын нэһилиэкпит иһиттэн булан күллүбүт- саллыбыт, үөрдүбүт-көттүбүт. Түмүккэ » Сүргэ көтөҕүү» диэн саха суруйааччыларын кини көрүүтүгэр саамай суолталаах хоһооннорун хомуурунньугуттан биирдии хоһоону талан аахтыбыт, сүргэ көтөҕүллэн, элбэҕи билэн- көрөн, астынан тарҕастыбыт. Маннык нэһилиэк киэн туттар дьонун чиэстиир, эдэр көлүөнэҕэ билиһиннэрэн сырдатар тэрээһиннэр үтүө үгэскэ кубулуйдуннар.

•