УЛУУ КЫАЙЫЫ 78 сылын көрсө

Өрөгөйдөөх Улуу Кыайыы күнүн Өкүндүгэ өрө күүрүүлээхтик бэлиэтээтибит. Кыайыы скверигэр аҕам саастаахтарбыт, тэрилтэлэр коллективтара, оҕо- аймах тоҕуоруһа муһунна. Олохтоох дьаһалта баһылыга дириҥ ис хоһоонноох эҕэрдэ тыл эттэ, сэрии оҕолоругар , ытык кырдьаҕастсрбытыгар үгэскэ кубулуйбут тэрилтэлэр күүстэринэн оҥоһуллубут сухой паек бэлэх туттартаата, соҕотох тыыл ветерана Р.Т.Сивцеваҕа депутат А.В. Гоголев аатыттан бэлэх уунна. Биһиги нэһилиэктэн Украинаҕа буола турар байыаннай дьайыыларга кыттыыны ыла сылдьар уолаттарбыт дьиэ кэргэттэригэр көмө- бэлэх туттарда. Салгыы В.П.Трофимова аатынан оскуола директора А.В.Шадрин, ветераннар сүбэлэрин салайааччыта Ф.А.Мандарова, сэрии оҕото Р.У.Иванова долгуйан туран тыл эттилэр. Биллэн турар, байыаннай дьайыыларга сылдьар хоһууннарбыт этэҥҥэ эргиллэн кэлэллэригэр эрэллэрин, алгыстарын эттилэр. Аҕа Дойду Улуу сэриитигэр тыыннарын толук уурбут биир дойдулаахтарбыт кэриэстэригэр чуумпуран туран мэҥэ бэлиэҕэ гирлянда уурулунна. Уһуйаан кырачаан иитиллээччилэрэ, оскуола оҕолоро эбээлэрин, эһээлэрин үйэтитэн хоһоон аахтылар. Сэрии оҕотун Розалия Устиновна хос сиэнин ырыатын сэргээн иһиттилэр, «Ура» хаһыыннан эҕэрдэлээтилэр. Быйылгы Кыайыы күнүн Саха Республикатыгар биллэриллибит Үлэ сылын чэрчитинэн үлэ коллективтарын (тэрилтэлэр) икки ардыларыгар ыытылла турар көрүү- күрэх үһүс түһүмэҕэ — хор киирсиитэ киэргэттэ, элбэх дьону түмэ тарта. Тэрээһин полевой кухня итии чэйдээх саллаат хааһытынан түмүктэннэ. Салгыы аҕам саастаахтарбыт нэһилиэк тэрилтэлэрэ тэрийбит мааны остуолларын тула түмүстүлэр. Кыайыы күнүн сүүрэн-көтөн тэрийсибит, күүс — көмө буолбут тэрилтэлэргэ барҕа махталбытын этэбит. Мэлдьи маннык түмсүүлээх, олох үөһүгэр этэҥҥэ доруобай буолуоххайыҥ!

Добавить комментарий

Ваш адрес email не будет опубликован. Обязательные поля помечены *

Яндекс.Метрика