Муус устар 27 күнэ — Саха сирин өрөгөйүн күнэ

Бу күн Өкүндү нэһилиэгэр өрө күүрүүлээх сэргэх, түмсүүлээх тэрээһиннэр ыытылыннылар. Ол курдук, оскуола иннигэр Социалистическай Үлэ Геройа В.П.Трофимова памятнигар тэрилтэлэр салайааччылара Н.В.Петров, А.В.Шадрин, нэһилиэк депутата А.В.Мандарова уонна кадет А.Боятанов күөх гирлянданы уурдулар. Үөрүүлээх митинг Добун оһуохайынан түмүктэннэ. Оһуохайы таһаарда А.В.Мандарова. Салгыы Үлэ, улууска Доруобуйа сылын чэрчитинэн нэһилиэк тэрилтэлэрин икки ардыларыгар ыытыллар «Үлэ,сайдыы -күргүөм күүс» көрүү- күрэх бастакы түһүмэҕэ- өбүгэ оонньуулара ыытылыннылар. Өбүгэ оонньуутун иннигэр көрүү- күрэх үөрүүлээх арыллыытын тэрилтэлэр парадтара уруй-айхал доҕуһуоллаах саҕалаата. Ситиһиилээх үлэлээх дьаһалта коллектива, кэлэр кэскили үөрэтэр-такайар оскуола коллектива , кэнчээри ыччаты иитэр уһуйаан, нэһилиэк культурнай олоҕун тэрийэр «Чэчир» НАДЬ коллективтара ветераннарын батыһыннаран сахалыы мааны таҥаһы таҥнан уруйданан киирдилэр. Көрүү-күрэх арыллыытын бэлиэтээн, Өкүндү былааҕа нэһилиэк гимнин доҕуһуолунан өрө күөрэйдэ. Салгыы аҕыс түһүмэхтээх өбүгэ оонньуутун көрөөччүлэр,ыалдьааччылар харыс да халбарыйбакка биир тыынынан көрдүлэр,сэргээтилэр. Түмүккэ Уһуйаан хамаандата үһүс бочуоттаах миэстэҕэ, дьаһалта хамаандата иккис, кыайыылааҕынан оскуола хамаандата таҕыста. Бары да кыахтаахтарын, кыайыыга дьулуурдарын көрдөрдүлэр, эрбии биитин курдук биир тэҥ эрийсэн тыҥааһыннаах киирсиини көрдөрдүлэр. Кыттыбыт түмсүүлэргэ, тэрийсибит тэрилтэлэргэ барҕа махталбытын этэбит. Көрүү- күрэхпит салҕанар, аны волейбол, кэнсиэр күрэҕи кыттааччылар, көрөөччүлэр долгуйа күүтэллэр. Кыайыы күнүн «Бастыҥ хор» күрэх киэргэтиэ, Өрүү маннык түмсүүлээх, көхтөөх буолуоҕуҥ.


Добавить комментарий

Ваш адрес email не будет опубликован. Обязательные поля помечены *

Яндекс.Метрика