МБУ ДНТ "Чэчир" МО "Екюндюнский наслег" МР "Вилюйский улус (район)" РС(Я) 
Сандал саас бастакы кэрэ бырааһынньыгын бэлиэтээн, Өкүндү нэһилиэгэр кэлбит эрэ кэрэхсиир, көрбүт эрэ күлүм аллайар сэргэх тэрээһин буолла.
Кулун тутар 7 күнүгэр үгэс буолбут «Күнчээн Куо 2023» алын кылаас оҕолорун кэрэ эйгэҕэ сыһыаран, талба талааннарын арыйан дьоҥҥо-сэргэҕэ таһаарар сыаллаах күрэхтэһии буолла. 1-2 кылаас кырачаан кэрэ куолара биэс түһүмэххэ бэйэлэрин көрдөрдүлэр.
Биллэн турар, бастакы түһүмэх сахалыы дьэрэкээн таҥастаах бэйэлэрин билиһиннэрдилэр.
Иккис түһүмэххэ, Саха Республикатыгар үлэ сылынан биллибитинэн, араас идэ таҥаһын таҥнан, уобарастарын арыйдылар.
Онтон сыыйа, үөрэх өттүн тургутуу — остуоруйалартан ыйытыктар буоллулар. Салгыы оҕолорбут ким үҥкүүлээн,
ким ыллаан,
ким хоһоон ааҕан, ким уруһуйдаан
талба талааннарын толору арыйдылар.
Бүлүү улууһугар доруобуйа сылын бэлиэтээн, салгыы спортивнай түһүмэх,
дьэ уонна, киэһээҥҥи мааны таҥас кэтэн хааман- сиимэн кынталдьыйан, кырачаан кыттааччыларбыт көрөөччүлэр куттарын туттулар.
Күрэх түмүгүнэн Нелли Петрова- «Нарыйаана Куо»,
Лена Поскачина — «Айталыына Куо»,
Инесса Петрова-«Чэмэлиинэ Куо»,
«Кэрэчээнэ Куо» — Марина Афанасьева,
«Айыллаана Куо»- Юлия Захарова,
«Мичийээнэ Куо»- Венера Иванова,
«Кэскилээнэ Куо» — Айсена Егорова
анал ааттарга тигистилэр. Онтон кыайыылааҕынан тахсан «Күнчээн Куо» аатын ылла Дайаана Петрова.
Кэрэ кыргыттар көрөөччүлэргэ умнуллубат дьоһун-мааны киэһэни бэлэхтээтилэр. Тэрээһини улуустааҕы «Карусель творчества» улуустааҕы фестиваль Гран При хаһаайката уһуйааммыт иитиллээччитэ Стефания Петрова индийскэй үҥкүүтүнэн,
улуустааҕы, республикатааҕы ырыа-үҥкүү конкурстарын лауреата, дипломана Динара Михайлова киэргэттилэр.
Дьоро киэһэни бэлэхтээбит кырачааннарбытыгар, төрөппүттэргэ махтал тылларын аныыбыт.
