Өкүндүлэр Бүлүү улууһун Үрүҥ Тунах ыһыаҕар

Кэтэһиилээх — күүтүүлээх улууспут ыһыаҕа дьэ ньиргийдэ. Манна Өкүндү нэһилиэгиттэн элбэх ахсааннаах делегация киирэн парадка кытынныбыт.

Бары биир курдук түмсэн, таҥнан-симэнэн киирсибит, ыһыах үөрүүтүн үллэстибит Далбар Хотуттарбытыгар, Эр Хоһууттарбытыгар барҕа махтал этэбит.

«Мин республикам — мин дьиэ кэргэним» диэн дьиэ кэргэн күөн күрэһигэр биһиги нэһилиэк биир тумус туттар ыала,

Константиновтар дьиэ кэргэттэрэ кыттан, опекун оҕолоох ыаллар диэн номинацияҕа бастаан, улуус баһылыга С.Н.Винокуровтан 15000 сертификат үөрүүлээх быһыыга — майгыга туттулар.

Любовь Владимировна, Виктор Иванович 5 оҕону иитэн-такайан сорохторун олох киэҥ аартыгар дьоһун дьон гынан куорсун анньан ыыттылар, өссө да үлэлэһэ сылдьаллар. Кинилэргэ бу үтүө, махталлаах идэлэригэр үрдүк ситиһиилэри, дьиэ кэргэттэригэр этэҥҥэ буолууну баҕарабыт. Кинилэри бу күрэххэ өйөөбүт, спонсор бэлэх туттарбыт олохтоох дьаһалтаҕа, Любовь Владимировна үлэлиир коллектива — Өкүндү оскуолатыгар, «Чэчир» НАДЬ кыайыы өрөгөйүн билбит Константиновтартан махтал тылларын тиэрдэбит.

Өссө төгүл барыгытын Үрүҥ Тунах ыһыахтарынан эҕэрдэлиибит.