«Дорообо, төрөөбүт алааһым» Н.М.Иванова хоһоонун хомуурунньугун сүрэхтэниитэ

Ыам ыйын 25 күнүгэр биһиги нэһилиэккэ биир үөрүүлээх түгэн тосхойдо. Ол курдук, Өкүндү нэһилиэгин бочуоттаах олохтооҕо, үлэ бэтэрээнэ Нина Михайловна Иванова «Дорообо, төрөөбүт алааһым» диэн хоһоон хомуурунньугун сүрэхтэниитэ буолла.

Кинигэҕэ 30 хоһоон киирдэ, Дьокуускай куорат Гагарин аатынан типографияҕа автор 75 сааһын көрсө бэчээттэнэн тахсыбыта. Олус истиҥ, сэргэх тэрээһин буоларын кэлбит дьон бэлиэтээн махтал тылларын анаатылар. Сүрэхтэнии автор кинигэ аатын курдук «Дорообо, төрөөбүт алааһым» хоһоонун «Чэчир» НАДЬ салайааччыта М.Г.Сивцева ааҕыытынан саҕаланна.

Салгыы кинигэ тутулун билиһиннэрдэ олохтоох библиотека үлэһитэ М.Д.Михайлова.

Кинигэҕэ аан тылын суруйбут СР үөрэҕириитин туйгуна, Нина Михайловна үөлээннээҕэ А.В.Мандарова эҕэрдэлээтэ.

Олохтоох дьаһалта аатыттан баһылыгы солбуйааччы Н.П.Иванова, оҕо уһуйаанын аатыттан Б.Г.Сивцева, В.П.Трофимова аатынан Өкүндү оскуолатын аатыттан директоры иитэр үлэҕэ солбуйааччы Б.Н.Васильев эҕэрдэлээтилэр, сибэкки дьөрбөтүн туттардылар.

Элбэх эҕэрдэ тыл этилиннэ, хоһоон ааҕылынна, өйдөбүнньүк бэлэх, сибэкки туттарылынна.

Тэрээһини Нина Михайловна аймахтара, устудьуон саҕанааҕы дьүөгэтэ А.В.Томская кэлэн киэргэттилэр.

Кэлбит дьон сүрэхтэнэр дьоҕус хомуурунньук күннээҕи кэрэни хоһуйар олус истиҥ, сылаас эйгэлээҕин бэлиэтээтилэр, бары аны хаһыакка тахсыбыт ыстатыйаларын, тахсыбатах хоһооннорун түмэн, өссө да талаана сайдан эбии элбэх хоһоон айан иккис кинигэтин таһаарарыгар баҕа санааларын эттилэр.

Автор кинигэтэ күн сирин көрбүтүгэр тирэх буолбут кыыһыгар, Р.И.Ивановаҕа, көмөлөспүт дьонугар- Н.П.Ивановаҕа, «Чэчир»НАДЬ үлэһиттэригэр махтал тылларын анаата. Өссө биирдэ Нина Михайловнаны кинигэтин сүрэхтэниитинэн, нэһилиэк олохтоохторун өссө биир олохтоох автордаммыппытынан, саҥа кинигэлэммиппитинэн эҕэрдэлиибит. Кэрэни кэрэхсиэххэ, үтүөнү үксэтиэххэ.