Улуу Кыайыы 77 сылын көрсө Өкүндү нэһилиэгин үөрүүлээх парада

Ыам ыйын 9 күнэ — Өрөгөй күнэ. Бу күн хаары-тыалы ахсарбакка Өкүндү нэһилиэгэр үөрүүлээх парад өрө күүрүүлээхтик ыытылынна.

Сарсыардаттан дьаһалта иннигэр Кыайыы өрөгөй ырыалардаах музыка ньиргийэн дьону парадка угуйда. Сэриигэ сырдык тыыннарын толук уурбут буойуттар, этэҥҥэ эргиллэн кэлэн ветеран аатын ылбыттар, тыылга, үлэ фронугар кыайыыны уһансыбыттар хаартыскалара «Өлбөт-сүппэт полка» буолан парадка кыттыста.

Парады саҕалаата эдэр кэскиллээх баһылык арыаллаах ытык кырдьаҕастарбыт түмсүүтэ уонна дьаһалта коллектива.

Онтон үгэс курдук кэнчээри ыччаттарбыт -оҕо уһуйаана иитиллэччилэриниин уонна Үлэ Дьоруойа В.П.Трофимова аатын сүгэр оскуола коллектива үөрэнээччилэрин кытта.

«УРА» күргүөм хаһыынан доҕуһуоллатан Кыайыы скверигэр тиийэн кэллэ. Үөрүүлээх митини эҕэрдэ тылынан саҕалаата баһылык Н.В.Петров.Салгыы нэһилиэк дьонун эҕэрдэлээтилэр сэрии оҕото, үлэ ветерана Р.У.Иванова, ветераннар советтарын салайааччыта Ф.А.Мандарова.

Кэнчээри уһуйаан оҕолоро сэриигэ сылдьыбыт хос хос эһээлэрин, тыылга үлэлээбит хос хос эбээлэрин туһунан киэн тутта кэпсээн, хоһоон ааҕан, ырыа ыллаан дьон болҕомтотун тартылар, хайҕалын ыллылар. 5 кылаас үөрэнээччитэ Кристина Федорова эбээтэ, ветеран учуутал Р.Т.Сивцева оскуолаҕа үөрэнэ сылдьан ааҕар «Победа» хоһоонун ааҕан көлүөнэлэр ситимнэрин бигэргэттэ. «Кыһыл сулус» орден кавалера А.П.Иванов сиэннэрэ Сандара, Айылҕан Ивановтар «Ытыктааҥ ветераннары» диэн ырыанан митини киэргэттилэр.

Сэрииттэн төннүбэтэх буойуттарга анаммыт обелиска уонна үс бииргэ төрөөбүт убайдыы-бырааттыы Сортоевтарга аналлаах мэҥэ бэлиэҕэ гирляндалар уурулуннулар.

Үгэс буолбут полевой кухня минньигэс хааһытынан уонна сылаас чэйинэн кэлбит дьону ириэрдилэр, күндүлээтилэр оскуола повардара Л.Константинова, С.Каратаева.

Мантан салгыы «Ис сүрэхтэн» сылаас чэйдээх остуол тула кырдьаҕастар мустан, икки уһун сыл хамсык кэннэ ахтыспыттарын таһаардылар, ирэ-хоро кэпсэттилэр, ырыа-тойук тартылар.