Биир дойдулаахпыт Н.Р.Константинов үбүлүөйүгэр аналлаах «Күөгү-2022» күрэхтэн сонуннар

Бу дьыл Муус устар 2 күнүгэр Хочуоннаах Эбэҕэ Саха АССР 100 сылын, Бүлүү улууһугар Чулуу дьон сылын бэлиэтээһин чэрчитинэн Аҕа күнүн уонна Булчут күнүн көрсө, биир дойдулаахпыт Саха АССР XII ыҥырыылаах Верховнай Советын депутата, Россия Бочуоттаах архивиһа, СР норуотун хаһаайыстыбатын Үтүөлээх үлэһитэ, Эдьигээн улууһун Бочуоттаах олохтооҕо Н.Р.Константинов 75 сааһын бэлиэтиир «Күөгү-2022» күрэх үрдүк таһымнаахтык ыытылынна.

Бүлүүттэн, Лөкөчөөнтөн, Хампаттан, Сыдыбылтан, Өкүндүттэн уопсайа 10 хамаанда кыттыыны ылла. Эҕэрдэ тылларын кыттааччыларга тиэртилэр «Өкүндү нэһилиэгэ» МТ баһылыга Н.В.Петров, улуус культуратын уонна норуот айымньытын киинин специалиһа, биир дойдулаахпыт Л. Я.Кононова, муниципальнай архив сүрүн архивиһа Н.С.Филиппова.

Аал уоту арыылаах алаадьынан аһатан алҕаата Николай Романович бииргэ төрөөбүт быраата И.В.Иванов. Күрэх кылаабынай судьуйата олохтоох дьаһалта сүрүннүүр специалиһа П.В.Петров старт биллэриитинэн 3 чаастаах балыктааһын саҕаланна. Араас өҥнөөх былааҕынан тэлибирээн, «Чэчир»НАДЬ үлэһиттэрин кыттааччыларга анаммыт шашлыгын сытынан дыргыйан, Эр хоһууннарга аналлаах музыка доҕуһуоллаах 3 чаас биллибэккэ ааста.

Түмүгэр бултаммыт балык киилэтинэн 3 миэстэ Лөкөчөөн хамаандата таҕыста, 2 миэстэҕэ Хампа хамаандата, 1 миэстэҕэ Бүлүү хамаандата 24 киилэ 700 гр бултаах таҕыста.

Кыайыылаахтар олохтоох дьаһалта уонна Николай Романович аймахтарын аатыттан боточчу харчы бириис тутан үөрдүлэр-көттүлэр. Түмүккэ аны саамай түргэн ойбон тэһээччи уонна саамай бастакыннан балык хаптарааччы күрэҕэ буолла.

Түргэн буурдааччы Хампа хамаандатын чилиэнэ буолла, бастакы балык хаптаран Николай Романович анал бирииһин 5000 солк. Өкүндү Харлампьев Ньургустаан ыланнар өрөгөйдөрө үрдээтэ.

Маны таһынан 2,3 миэстэлэргэ барыларыгар спонсордар бириистэрэ, араас анал ааттар туттарылыннылар. Күрэх истиҥ, доҕордуу тыыннаах ааста, үөрүү-көтүү аргыстаах бары күргүөм «Николай Романовичка эҕэрдэ уонна махтал» диэн саҥаннан видеоҕа уһуллуннубут.

Өкүндү хамаандалара бултаабыт балыктарын баһылык Никифор Петров этиитин ылынан нэһилиэк кырдьаҕастарыгар, балыктыыр дьоно суох дьонугар тарҕатан ытык дьон махталларын ыллылар, үөлээннээхтэрин, Николай Романовичтан бэлэх туппут саҕа сананнылар.

Добавить комментарий

Ваш адрес email не будет опубликован. Обязательные поля помечены *

Яндекс.Метрика