Ытык — мааны биир дойдулаахтарбыт Светлана Григорьевна Мытник үс авторскай кинигэтин сүрэхтэниитин, сцена ветерана Николай Петрович Трофимов 75 сааһын туолбут үбүлүөйүттэн сонуннар

Кулун тутар 4 күнүгэр, өкүндүлэр киэн туттар биир дойдулаахпыт Мытник Светлана Григорьевна ааспыт сылга бэчээттэтэн таһаарбыт 3 кинигэтин: «Фермалар», «Олоххо уостубат таптал», «Маҥнайгы учууталым» кинигэлэрин сүрэхтэниитэ Н.Г.Чернышевскай аатынан Бүлүүтээҕи профессиональнай педагогическай колледж иһинэн үрдүк таһымҥа буолан ааста. РФ журналистарын, СР худуоһунньуктарын Союһун чилиэнэ, «СР норуоттарын уус-уран айымньытыгар кылаатын иһин», РФ үөрэҕириитин Туйгуна, Бочуоттаах ветерана о.да а. бэлиэлэр, анал ааттар хаһаайыннара, үгүс элбэх былааннаах, проектардаах бу барыта биһиги кыыспыт — Светлана Григорьевна! Бу күн нэһилиэкпит баһылыга Никифор Петров Светлана Григорьевна төрөөбүт-үөскээбит нэһилиэгэр үгүс үтүөтүн, өҥөтүн ахтан туран, «Өкүндү нэһилиэгин Бочуоттаах олохтооҕо» бэлиэни туттарда. Дьоро киэһэни биир дойдулаахтара, Ырыа Дуоланнар Иван Данилов, Николай Иванов ыллаан-туойан киэргэттилэр. Светлана Григорьевнаны түбүктээх үлэтин түмүктэрэ күн сирин көрбүттэринэн өссө төгүл эҕэрдэлээн туран, айар үлэтигэр саҥа чыпчааллары, дабайыылары, кыайыылары уонна тус олоҕор дьолу-соргуну баҕарабыт.

Кулун тутар 9 күнүгэр культура ветерана, СР культуратын Туйгуна, биир дойдулаахпыт Трофимов Николай Петрович 75 сааһын туолбут өрөгөйдөөх үбүлүөйүнэн анал делегация киирэн эҕэрдэлээн таҕыстыбыт. Эдэр баһылык Никифор Владимирович нэһилиэгин дьонун-сэргэтин, тус бэйэтин аатыттан эҕэрдэлээн туран «Өкүндү нэһилиэгин Бочуоттаах олохтооҕо» бэлиэни ытык киһибитигэр үөрүүлээх быһыыга туттарда. Ветераннар советтарын бэрэссэдээтэлэ Ф.А. Мандарова Эҕэрдэ Сурук, нэһилиэк культуратын дьиэтин директора М.Г.Сивцева сибэкки дьөрбөтүн кытары эмиэ Эҕэрдэ сурук туттаран, үбүлүөйдээх киһи үөрүүтүн үксэттилэр. Үөлээннээхтэрэ, табаарыстара Иван Данилов, Николай Егоров, Николай Захаров киирэннэр, ырыа-тойук арааһа ылланна, эҕэрдэ эгэлгэтэ этилиннэ. Сылаас дьиэҕэ остуол тула олорон урукку-хойукку көрдөөх сырыылары, буолбут гастроллары, агитбригадалары, кыһыл муннуктары, араас таһымнаах бэстибээллэри ахтан-санаан, күлэн-үөрэн, көрсүспэтэх ырааппыт дьон быһыытынан ирэ-хоро кэпсэтэн, астынан-дуоһуйан тарҕастыбыт. Түмүккэ, тыаттан киирбит дьон сиэринэн Петровичпытыгар дойдутун этин-балыгын, отонун-барыанньатын, үүтүн-сүөгэйин туттардыбыт.
Күндү киһибит Николай Петрович! Олох очурдарын хорсуннук киэр хаһыйан күннээҕи үөрүүннэн, чуумпу дьолунан дуоһуйан өссө да өр кэмҥэ чэгиэн сылдьаргар баҕарабыт. Этэҥҥэ бу курдук үөрэ-көтө, ыллыы-туойа, кэрэ ырыаларгын бар дьоҥҥор бэлэхтии сырыт, оҕолоруҥ, сиэннэриҥ үөрүүлэринэн олоҕуҥ уһаатын диэн алгыспытын аныыбыт.

Добавить комментарий

Ваш адрес email не будет опубликован. Обязательные поля помечены *

Яндекс.Метрика